Monday, 6 May 2019

పదోతరగతి ఫలితాలు ఎప్పుడంటే?

నిజామాబాద్‌‌ వార్త: తెలంగాణలో పదోతరగతి ఫలితాల వెల్లడి మరింత ఆలస్యమయ్యేలా కనిపిస్తోంది. ఇంటర్ ఫలితాల్లో తప్పులు దొర్లిన నేపథ్యంలో.. పదోతరగతి ఫలితాలపై పాఠశాల విద్యాశాఖ అధికారులు ప్రత్యేక దృష్టి సారించారు. ఇందులో భాగంగా ఒకటికి రెండుసార్లు పరిశీలించిన తర్వాతే ఫలితాలను వెల్లడించనున్నారు. అదే విధంగా పాఠశాల హెడ్‌మాస్టర్లకు కూడా ఫలితాలను పంపనున్నారు. అన్ని ప్రక్రియలు పూర్తయితే.. మే మూడోవారంలో పదోతరగతి ఫలితాలు వెలువడే అవకాశం ఉంది. ఫలితాల వెల్లడి రోజున ప్రిన్సిపల్స్, టీచింగ్ స్టాఫ్ అందరూ వారివారి పాఠశాలలకు హాజరుకావాల్సి ఉంటుంది.
ఇప్పటికే పదో తరగతి సమాధాన పత్రాల వ్యాల్యూయేషన్ పూర్తయినప్పటికీ.. ఫలితాల వెల్లడిలో చాలా జాగ్రత్తలు తీసుకుంటున్నారు. ఫలితాల వెల్లడిలో ఆలస్యమైనా.. కచ్చితత్వంతో ఫలితాలు ఇస్తామని పాఠశాల విద్యాశాఖ అధికారులు అంటున్నారు. ఇందులో భాగంగా ముందు జాగ్రత్తగా కొన్ని జవాబు పత్రాలు రీ వెరిఫికేషన్ కూడా చేస్తున్నారు. విద్యార్థులకు ఏవైనా సందేహాలుంటే తమ దృష్టికి తీసుకురావాలని అధికారులు విజ్ఞప్తి చేశారు. విద్యార్థులు నేరుగా ఫిర్యాదు చేసేలా ఆన్‌లైన్‌లో ఏర్పాట్లు కూడా చేశారు.
ఒక సబ్జెక్టులో అధిక మార్కులు వచ్చి వేరే సబ్జెక్టులో ఫెయిల్‌ అయితే మరోసారి పరిశీలింనున్నారు. ఫలితాలు ప్రకటించిన వెంటనే ఆయా పాఠశాలల ప్రధానోపాధ్యాయుల లాగిన్‌లో పూర్తి వివరాలు అందుబాటులో ఉంచనున్నారు. విద్యార్థి పేరు, గ్రేడ్‌ ఏంటి? సబ్జెక్టుల వారీగా ఫలితాలను అందుబాటులో ఉంచుతారు. ప్రతి విద్యార్థికీ వచ్చిన మార్కులు, గ్రేడ్‌లు ఒకటికి రెండుసార్లు సరిచూసుకున్నాకే ఫలితాలు ప్రకటించనున్నారు.
ప్రతి విద్యార్థి గ్రేడ్‌ ఒకటికి రెండుసార్లు చెక్‌చేసి ఫలితాలు విడుదల చేస్తామని.. ఏ సబ్జెక్ట్‌లోనైనా సున్నా వస్తే రీ చెక్‌ చేసిన తర్వాత ఫైనల్‌ చేస్తామని పాఠశాల విద్యాశాఖ కమిషనర్‌ విజయ్‌ కుమార్‌ స్పష్టం చేశారు. ఫలితాల వెల్లడికి ముందు ఐదు అంచెల్లో తనిఖీలు చేయనున్నట్లు.. విద్యార్థుల తల్లిదండ్రులు ఎవరూ ఆందోళన చెందవద్దని. ఆలస్యం అయినా పక్కాగా పది ఫలితాలు విడుదల చేస్తామని ఆయన భరోసా ఇస్తున్నారు.

No comments:

Post a Comment