Monday, 21 November 2016

అండగా ఉంటానని వెళ్లి... అనంత లోకాలకు...



    అండగా ఉంటానని వెళ్లి... అనంత లోకాలకు...
    దుబాయ్‌లో రుద్రూర్‌ వాసి మృతి 

    నవంబర్ 22, నిజామాబాదు వార్త.కామ్: కుటుంబ సభ్యులకు అండగా ఉంటానని... ధైర్యం చెప్పి దేశం కాని దేశం వెళ్లి ఒక యువకుడు మృతి చెందిన సంఘటన సోమవారం వెలుగులోకి వచ్చింది. వృద్ధులైన తల్లిదండ్రులు, కట్టుకున్న భార్య, ముగ్గురు పిల్లల పోషణ కోసం ఆర్నెల్ల క్రితం పొట్ట చేతపట్టుకుని అప్పులు చేసి దుబాయ్‌ వెళ్లిన యువకుడు నాలుగు రోజుల క్రితం దుబాయ్‌లో గుండెపోటుతో మృతి చెందారు. రుద్రూర్‌ మండల కేంద్రానికి చెందిన వీరయ్య, లక్ష్మమ్మల కుమారుడు నగేష్‌ (35) ఆర్థిక పరిస్థితుల మూలంగా దుబాయ్‌ వెళ్లాడు. రెక్కాడితేనే కాని డొక్కాడని కుటుంబం. ఇంట్లో కట్టుకున్న భార్యతో సహా తల్లిదండ్రులు కూలి పని చేస్తేనే కుటుంబం గడవాల్సిన పరిస్థితి. శివకుమార్‌(12), శ్రావణి(8), వినోద్‌(3) సంతానం. తల్లిదండ్రులు వృద్ధులు కావడంతో సరైన పనులు ఇక్కడ లేకపోవడంతో దుబాయ్‌ వెళ్లి వస్తానని ఇంట్లో నచ్చచెప్పారు. గతంలో ఒక సంవత్సరం దుబాయ్‌లో ఉండి వచ్చిన నగేష్‌ ఆర్నెల్ల క్రితం ఎన్నో ఆశలతో మళ్లీ వెళ్లారు. అక్కడ పనులు చేసుకుంటూ రోజూ ఫోన్‌లో కుటుంబ సభ్యులతో మాట్లాడుతూ ఉండేవాడు. ఆర్థికంగా ఎదిగి... కుటుంబాన్ని మంచిస్థాయికి తీసుకొస్తానని... నాకోసం ఆందోళన చెందవద్దని నిత్యం నగేష్‌ కుటుంబ సభ్యులకు ధైర్యం చెప్పేవాడు. రోజూలాగే మూడు రోజుల క్రితం ఫోను రావడంతో నగేష్‌ చేశాడనుకుని సంబరపడిన కుటుంబ సభ్యులకు మృత్యువార్త తెలిసింది. విషయాన్ని వృద్ధులైన తల్లిదండ్రులకు తెలిస్తే వారు ఏమైపోతారోనన్న ఆందోళనతో తెలియనివ్వలేదు. మృతదేహాన్ని స్వగ్రామానికి తీసుకురావడం విషయంలో ఆదివారం రాత్రి తల్లిదండ్రులకు తెలియజేశారు. దీంతో కన్నీటి పర్యంతమయ్యారు. ఈ సంఘటనతో గ్రామంలో విషాదం నెలకొంది. ఒక్క ఇల్లు తప్ప ఏమీలేని బాధిత కుటుంబానికి ప్రభుత్వం చేయూతనివ్వాలని స్థానిక ప్రజా ప్రతినిధులు, గ్రామస్థులు కోరుతున్నారు.

    No comments:

    Post a Comment