Thursday, 17 November 2016

కలెక్టరేట్‌ ఎదుట ప్రైవేటు వైద్యుల ధర్నా



నవంబర్ 17, నిజామాబాదు వార్త.కామ్:

 ప్రైవేటు వైద్యుల సమస్యలు పరిష్కరించి.. కఠితరమైన నిబంధనలను సడలింపు చేయాలని కోరుతూ బుధవారం జిల్లా కేంద్రంలో కలెక్టర్‌ కార్యాలయం ఎదుట ధర్నా నిర్వహించారు. ఈ సందర్భంగా ఐఎంఏ అధ్యక్షుడు రవీంద్రనాథ్‌ సూరి మాట్లాడుతూ.. యునాని, ఆయుర్వేద, హోమియోపతి వైద్యులకు ఆరు నెలలు శిక్షణ ఇచ్చి వారితో అలోపతి మందులు రాయించి రోగులకు వైద్యం చేసే ఏర్పాట్లు చేయడం సరైన పద్ధతి కాదన్నారు. ఐదు సంవత్సరాల పాటు వైద్య వృత్తి చదివిన వారిని పక్కన పెట్టి ఆయూష్‌ వైద్యులకు ఆరు నెలల శిక్షణతో అలోపతి మందులు రాయించడం నిబంధనలకు విరుద్దమన్నారు. నిబంధనల ప్రకారం వైద్యులకు ప్రాతినిధ్యం లేకుండా ప్రభుత్వ అధికారులతో నియమించబడిన నేషనల్‌ మెడికల్‌ కమిషన్‌ చట్టానికి తగిన సవరణలు తీసుకొచ్చి అవినీతిరహితంగా ప్రభావ వంతంగా తీర్చిదిద్దాలని కోరారు. స్కానింగ్‌ చేసిన వారి పేరు రిజిష్టర్‌లో నమోదు చేయకపోయినా, సిబ్బంది వల్ల చిన్నపాటి తప్పులు దొర్లినా రేడియాలజిస్టులదే బాధ్యత అని చెప్పే చట్టాలను వెంటనే రద్దు చేయాలన్నారు. వైద్యులపై దాడులను, దౌర్జన్యాలను అరికట్టేందుకు కేంద్ర చట్టాన్ని తీసుకొనిరావాలని ఐఎంఏ డిమాండు చేస్తున్నట్లు తెలిపారు. ఈ సత్యాగ్రహం కార్యక్రమంలో ఐఎంఏ వైద్యులు అనీల్‌కుమార్‌, ఉష, మల్లీశ్వరి, వినోద్‌కుమార్‌ గుప్తా, శ్రీనివాస్‌, లక్ష్మారెడ్డి, వసంత్‌రావు, కిషన్‌, కవితారెడ్డి, రవీందర్‌ రెడ్డి, హరీష్‌స్వామి, విశాల్‌, హరికృష్ణ, జీవన్‌రావు, తదితరులు పాల్గొన్నారు.

ఆస్పత్రులు మూసివేత

వైద్యుల ధర్నా కారణంగా ఉదయం 9 గంటల నుంచి మధ్యాహ్నం 2 గంటల వరకు జిల్లావ్యాప్తంగా ఆస్పత్రులు మూసిశారు. అన్ని ఆస్పత్రుల్లో ఓపీ పూర్తిగా మూసివేసి అత్యవసర పరిస్థితి ఉంటేనే వైద్యులు రోగులను చేర్చుకున్నారు. ఉదయం నుంచి మధ్యాహ్నం వరకు ఆస్పత్రులు వెలవెలబోయాయి. 24 గంటలు రద్దీగా ఉండే ఖలీల్‌వాడి రోడ్లు నిర్మానుష్యంగా కనిపించాయి. దూరప్రాంతాల నుంచి వచ్చిన రోగులు వైద్యులు లేకపోవడంతో ఇబ్బందులు ఎదుర్కొన్నారు.

No comments:

Post a Comment